जीवनात ही घडी

जीवनात ही घडी अशीच राहु दे
प्रीतिच्या फुलावरी वसंत नाचु दे

रंगविले मी मनात चित्र देखणे
आवडले वेडीला स्वप्न खेळणे
स्वप्नातिल चांदवा जीवास लाभु दे
जीवनात ही घडी अशीच राहु दे

हळुच तुला बघण्याचा छंद आगळा
लज्जेचा त्याविण का अर्थ वेगळा
स्पर्षातुन अंग अंग धुंद होऊ दे
जीवनात ही घडी अशीच राहु दे

पाहु दे असेच तुला नित्य हासता
जाउ दे असाच काळ शब्द झेलता
मीलनात प्रेमगीत धन्य होऊ दे
जीवनात ही घडी अशीच राहु दे

गीत : यशवंत देव
संगीत : यशवंत देव
स्वर : लता मंगेशकर